නව ලෝක ආර්ථිකයක් – නව නොබැඳි ව්‍යාපාරයක්! – යානිස් වරුෆකිස් (දෙවන කොටස)

දෙවන කොටස

2023 ජනවාරි මස ‘නව අන්තර්ජාතික ආර්ථික පර්යායක් සඳහා වූ සම්මේලනය’ නමින් අන්තර්ජාතික සම්මේලනයක් කියුබාවේ හවානා නුවර පැවැත්විණ.  මීට විවිධ රටවල් නියෝජනය කරමින්, රාජ්‍ය තාන්ත්‍රිකයන්, දේශපාලන නායකයන්, සමාජ ක්‍රියාකාරීන් සහභාගී වූහ. පහත පලවන්නේ එම සම්මේලනය අමතා, ග්‍රීසියේ හිටපු මුදල් ඇමති, යානිස් වරුෆාකිස් කල කථාවේ සිංහල පරිවර්තනයයි. ‘නව අන්තර්ජාතික ආර්ථික පර්යාය’ (New international economic order) යනු 1960 ගණන්වල නොබැඳි ජාතීන්ගේ ව්‍යාපාරය විසින් මතු කල සටන් පාඨයකි. අන්තර්ජාතික ආර්ථිකය ගෝලීය උතුරට වාසිදායක ලෙස ව්‍යුහගත වී තිබෙන බවට තර්ක කල අලුත නිදහස් වූ රටවල්, එහි පරිවර්තනයක් ඉල්ලා සිටියහ. 1974 වර්ෂයේ දී එක්සත් ජාතීන්ගේ මහා මණ්ඩලය ‘නව අන්තර්ජාතික ආර්ථික පර්යාය’ සම්බන්ධ ප්‍රකාශනය සම්මත කලාය. කෙසේ වුවද, 1980 ගණන්වල මතු වූ නව ලිබරල් ගෝලීයකරණය අබියස මෙම ව්‍යායාමය පරාජය ලැබුවේය. ගෝලීය දකුණේ රටවලට සාධාරණයක් ඉෂ්ට වන ලෙසට ලෝක ආර්ථිකය වෙනස් විය යුතු බවට වූ සාකච්ඡාව පසුගිය කාලය තුල යලිත් අලුත් වටයකින් මතු වී තිබේ. හවානා නුවර පැවැති සමුලුව මෙම ව්‍යායාමයේ එක් වැදගත් අවස්ථාවකි.

යානිස් වරුෆාකිස් 2015 දී බලයට පත් වූ ග්‍රීසියේ වාමාංශික සිරීසා ආණ්ඩුවේ මුදල් ඇමතිවරයා විය. යුරෝපීය බලවතුන් ආණ්ඩුව මත පැටවූ ආර්ථික ප්‍රතිසංස්කරණ වැඩපිලිවෙලට ආණ්ඩුව යටත් වීම විවේචනය කරමින් හේ ආණ්ඩුවෙන් ඉවත් විය. මේ වනවිට, ඔහු  MeRA25 නම් වූ සාර්ව-යුරෝපීය දේශපාලන ව්‍යාපාරයට නායකත්වය දෙයි. හේ ‘ප්‍රගතිශීලී ජාත්‍යන්තරය’ (progressive international) නම් අන්තර්ජාතිකයේ  සාමාජිකයෙක් ද වේ.

***

නව සීතල යුද්ධය

අද වන විට, චීන ප්‍රාග්ධනයට ලාභ ලබන්ට උදවු කල, සහ ඇමරිකානු කුලීකාර පන්තිය වෙත ආදායම් උපද වූ, ඇමරිකානු වෙලඳ හිඟය මත පදනම් වූ මෙම ගෝලීයකරණය වෙනුවට, මිහිතලය මත වන ජීවය මත අත්‍යාසන්න තර්ජනයක් ඇති කොට තිබෙන, එක්සත් ජනපදය හා චීනය අතර වන නව සීතල යුද්ධයක් ආදේශ වෙමින් තිබෙනවා. මෙම නව සීතල යුද්ධයට බලපා තිබෙන හේතු මොනවාද?

මම කලින් කී අන්ධකාර සම්මුතිය ක්‍රියාත්මක වන තාක් දුරට වොෂිංටනයට චීනයේ වේගවත් කාර්මිකකරණය ප්‍රශ්නයක් වූයේ නැහැ. එක්සත් ජනපදයේ වෙලද හිගය චීන කම්කරුවන්ගේ අතිරික්ත වටිනාකම උද්ධරණය කොට, ඇමරිකානු වත්කම් මත ගොඩගැසීම සඳහා වූ මෙවලමක් ලෙස භාවිතා කරන්ට චීන ධනපතීන් අවශ්‍ය වූ තාක් දුරට වොෂිංටනය චීනයේ සංවර්ධනය ඉවසුවා.

මොකක්ද එතකොට වෙනස් වෙලා තිබෙන්නේ? කරුණු දෙකක් තිබෙනවා. පලමු වෙනස, නව ආකාරයක ප්‍රාග්ධනයක පැන නැග්ම. මා මෙයට කියන්නේ ක්ලවුඩ් ප්‍රාග්ධනය (cloud capital) කියලා. කාල් මාක්ස් නිර්වචනය කල ලෙස, ප්‍රාග්ධනය කියන්නේ නිෂ්පාදිතයන්ගේ නිෂ්පාදන මාධ්‍යයක් ; වාෂ්ප එංජිමේ සිට ට්‍රැක්ටරය, වර්තමාන කාර්මික රොබෝවරුන්ගේ සිට 3 ඩී මුද්‍රණ යන්ත්‍ර දක්වා වූ සියල්ල ප්‍රාග්ධනය. ක්ලවුඩ් ප්‍රාග්ධනය කියන්නේ මොකක්ද? එය අන්තර්ජාලය-පාදක හෝ ක්ලවුඩ්-පාදක වූ,  චර්යාමය වෙනස්කම් නිෂ්පාදනය කෙරෙන නිෂ්පාදන මාධ්‍යයක්.

ධර්මදේශනා පැවැත්වීම, අලංකාරෝක්තීන් හා වෙලඳ දැන්වීම් තරම් ඉතිහාසයට දිව යන්නක් චර්යාමය වෙනස්කම් කිරීම . එහෙත් නූතන අධි-තාක්ෂණය පැන නගින තෙක්, මිනිස් චර්යාවන් වෙනස් කල හැකි වූයේ පූජකවරු, කථිකයන්, වෙලඳ දැන්වීම්කරුවන් ආදී ලෙස මනුෂ්‍යයන්ට පමණයි. අද වන විට, කෘතිම බුද්ධිය යොදාගෙනෙ, යන්ත්‍ර විසින් මිනිස් චර්යාවන් වෙනස් කරනු ලබනවා. ක්ලවුඩ් ප්‍රාග්ධනය පාලනය කරන අය, එන්න එන්නම ලෝකයේ අතිරික්ත වටිනාකමේ වැඩි පංගුවක් අත්පත් කරගනිමින් ඉන්නවා!

ක්ලවුඩ් ප්‍රාග්ධනයේ මෙම පැන නැගීම නව සීතල යුද්ධයට හේතු වී තිබෙන්නේ කොහොමද? මේක තමයි පලමුව ඩොනල්ඩ් ට්‍රම්ප් හා දැන් ජෝ බයිඩන් චීනය ඉලක්ක කරන්ට හේතුව. අපි බලමු ඒ ඇයි කියලා. ඇමරිකාව ලෝකය පාලනය කරන්නේ මූල්‍ය පද්ධතිය පාලනය කිරීම මගින් ; වෝල් වීදිය හා ඩොලරය හරහා. මේ වනවිට, සිලිකන් නිම්නය හරහා ක්ලවුඩ් ප්‍රාග්ධනය ඔවුන් පාලනය කරනවා. හැබැයි දැන් දැන් චීනය මේ ක්ෂේත්‍ර දෙක තුලම, එනම් මුදල් හා ක්ලවුඩ් ප්‍රාග්ධනය කියන අංශවල ඇමරිකාවේ ආධිපත්‍යය අභියෝගයට ලක්කොට තිබෙනවා.  චීන සමාගමකට අයත් වී චැට් නම් වූ ජංගම පණිවුඩ යෙදවුම එක දවසකට පමණක් හුවමාරු කරන පණිවුඩ සංඛ්‍යාව බිලියන 38ක්. මුදල් ගනුදෙනුවක් කරන්ට වී චැට් යෙදවුමින් ඉවත් වීම අවශ්‍ය නැහැ. වී චැට් වේදිකාව පාවිච්චි කරලා සිංදු අහන ගමන්, ටීවී සීරිස් එකක් බලන ගමන්, චීනයේ ඉන්න කෙනෙක්ට සල්ලි යවන්න ඒ වේදිකාවම පාවිච්චි කල හැකියි. ඒ වගේම, චීන බැංකුවල යුආන් ගිණුම් විවෘත කොට තිබෙන, වී චැට් යෙදවුම ඩවුන්ලෝඩ් කොට තිබෙන චීනයෙන් පිටත ජීවත් වන මිලියන සංඛ්‍යාත පිරිස් වෙත ද මෙලෙස මුදල් යැවිය හැකියි.

අනෙක් වැදගත් වර්ධනය දෙස අපි ඊලගට බලමු ; චීනයේ මහජන බැංකුව විසින් පලමු රාජ්‍ය අනුග්‍රහය ලත් ඩිජිටල් මුදල් ඒකකය හදුන්වා දී තිබෙනවා. කෙටියෙන් කියනවා නම්, චීනයේ ව්‍යාපාර තන්ත්‍රය හා මධ්‍යම බැංකුව අත දැන් මනා ලෙස ඒකාග්‍ර වූ මුදල් ගනුදෙනු කිරීමේ හා දත්ත හුවමාරු කිරීමේ පද්ධතියක් තිබෙනවා. වෝල් වීදිය, ෆෙඩරල් රිසර්ව් ආයතනය හා සිලිකන් නිම්නය සමග මුදල් හා දත්ත සඳහා තරග කල හැකි දැනට පවතින එකම අධිවේගී මාර්ගය තමයි මේ.

මෑතක් වෙන තුරු චීනයේ මෙම අධිවේගී මාර්ගය වැඩිය පාව්චිචි වූයේ නැහැ. පුටින්ගේ ගජමිතුරු ව්‍යාපාරිකයන්, චීනයේ ධනපතීන් ආදී සියලු දෙනා මෑතක් වෙන තුරු ඩොලර් හොයන්න පාවිච්චි කලේ ඇමරිකානු මාර්ගය. එහෙත් ඉක්බිති, ව්ලැඩ්මීර් පුටින් යුක්‍රේනය ආක්‍රමණය කල අතර, රුසියාවේ මහ බැංකුවට අයිති ඇමරිකානු ඩොලර් බිලියන 300 ක් පමණ රඳවා ගැනීම මගින් එක්සත් ජනපදය ප්‍රතිචාර දැක්වූවා. එකපාරටම, ඇමරිකානු-නොවන ධනවතුන් අතර කලබැගෑනියක් මේ නිසා ඇති වූවා. මේ අය මුදල් ගනුදෙනු, ගිවිසුම් ඇති කරගැනීම හා දත්ත ආදිය සඳහා වැඩි වැඩියෙන් චීන ක්ලවුඩ් ප්‍රාග්ධනය-පාදක වූ මාර්ගය වෙත යොමු වෙන්ට පටන් ගත්තා.

ජනාධිපති බයිඩන් පසුගිය ඔක්තොම්බරයේ දී චීනයට එරෙහිව පූර්ණ යුද්ධයක් ප්‍රකාශයට පත්කලේ මේ නිසා. මයික්‍රො-චිප් මත ඔහු පැනැවූ සම්බාධකයේ අරමුණ වූයේ චීන අධි-තාක්ෂණික කර්මාන්තයට පහර ගැසීම. සිලිකන් නිම්නයේ හා වෝල් වීදියේ ඒකාබද්ධ ශක්තියට ඔරොත්තු දිය හැකි – ඇතැම් විට එය අබිබවා පවා යා හැකි තත්වයට වර්ධනය වන්ට පෙර, චීන අධි-තාක්ෂණික අංශය බිඳ දැමීම ඔහුගේ අපේක්ෂාවයි. මිත්‍රවරුනි, මෙම ගැටුම නිසා ලෝක සාමයට කිසිදු යහපතක් නම් වෙන්නෙ නැහැ.

න්‍යෂ්ටික විනාශයකට අද තරම් අප කිසිදාක සමීප වී නැහැ. මේ අතර, මනුෂ්‍යත්වයේ කාලය අවසන් බවට සන් කෙරෙන අනෙක් ඔරලෝසුව වන දේශගුණික ව්‍යසනය වේගයෙන් ඉස්සරහට යමින් තිබෙනවා. මෙම ද්විත්ව ව්‍යසනය අබියස, ගෝලීය පාලක පන්තිය මොකද කරන්නේ? ඔවුන්ට කල හැකි උපරිම දෙය, එක පාරට මේ අගාධ දෙකටම මනුෂ්‍ය වර්ගයා තල්ලු කිරීම! ඒක තමයි ඔවුන් කරමින් ඉන්නේ. නව අන්තර්ජාතික ආර්ථික පර්යායක් සඳහා කැඳවුම් කරන, නව නොබැඳි  ව්‍යාපාරයක් අපට අවශ්‍ය මෙන්න මේ නිසා.

නොබැඳි යන්නෙහි අර්ථය

නොබැඳි යනුවෙන් දේශපාලනිකව හා ආචාරධාර්මිකව අදහස් කරන්නේ කුමක්ද යන්න මේ අවස්ථාවේ අපි පැහැදිලි කර ගත යුතුයි.

එහි අදහස කිසිසේත්ම මධ්‍යස්ථතාවය නෙමෙයි. ඇතන්ස් ප්‍රකාශනයේ අප සඳහන් කල ලෙසට, අප පැහැදිලිවම ආක්‍රමණයට ලක්වූ අයගේ, ආක්‍රමණයේ වින්දිතයාගේ පැත්ත ගන්නවා. මධ්‍යස්ථතාවයක් අපට එතැන දී අදාල නැහැ. එය පලස්තීනය, යේමනය, බටහිර සහරාව සහ ඔවු, යුක්‍රේනය විය හැකියි. එහෙත් ඒ වගේම, ලෝකයේ කොතැනක සිදුවූවත්, මිනිස් අයිතිවාසිකම් හා ප්‍රජාතන්ත්‍රීය අයිතීන් උල්ලංඝණය වන විට, අප තමයි එය විවේචනය කිරීමේ ඉදිරියෙන්ම සිටිය යුත්තේ. අපගේ නව නොබැඳි ව්‍යාපාරය ඊනියා ලිබරල්වාදීන් හා ලිබටේරියන්වාදීන් අත තිබෙන නිදහස පිලිබඳ සටන් පාඨය උදුරා ගත යුතුයි ; අපගේ සහෝදරවරුන් වෙඩි තබා ඝාතනය කෙරෙන පෙරු දේශයේ සිට, ‘ස්ත්‍රිය-ජීවිතය-නිදහස’ යන සටන් පාඨය ඔස්සේ නිර්භීත පිරිමින්ව මෙහෙයවමින් සිටින ඉරානයේ නිර්භීත ගැහැණුන් දක්වා සියලු දෙනාට අපගේ සහයෝගය ලබා දිය යුතු වේ.

ඒත්, ඔබ කියාවි. ඉරාන ආණ්ඩුව එක්සත් ජනපද අධිරාජ්‍යවාදයට ප්‍රතිරෝධය දක්වනවා නොවේද? පැහැදිලිවම. එහෙත්, ආණ්ඩුවක් එක්සත් ජනපද අධිරාජ්‍යවාදය සමග ගැටුමක සිටි පමණින්, එම රටේ ජීවත් වන අපගේ සහෝදරවරුන්ගේ මූලික අයිතිවාසිකම් උල්ලංඝණය කිරීමට බලපත්‍රයක් ලැබෙන බව අදහස් වෙන්නෙ නැහැ.

මගේ අදහස වන්නේ සැබෑ ලෙසම නොබැඳි ව්‍යාපාරයක් දයලෙක්තික විය යුතු බවය ; අපට ඉරාන රාජ්‍යය එක්සත් ජනපදයේ හමුදා තර්ජන හා ආර්ථික සම්බාධකවලට එරෙහිව ආරක්ෂා කරන ගමන්, එම ආණ්ඩුවේ දූෂිත පූජකතන්ත්‍රවාදයට, සීඅයිඒ සංවිධානයේ දේශීය ඒජන්තයන් හා ඇමරිකානු රාජ්‍ය දෙපාර්තමේන්තුවේ ඉත්තන්ට එරෙහිව සටන් කරන ඉරාන ප්‍රගතිශීලීන්ට අපි සහයෝගය දැක්විය යුතුයි.

දැන් ඔබ අසාවි :‘චීනය ගැන මොකද කියන්නේ?’. නව නොබැඳි ව්‍යාපාරයක් චීන ප්‍රශ්නය ගැන ගත යුතු ආස්ථානය මොකක්ද? එය ද්වි-ආකාර විය යුතු බව මගේ පිලිතුරයි :

පලමුව, ගෞරවාන්විත ලෙස. චීන ජනතව විසින් සිදු කොට තිබෙන ආර්ථික ප්‍රාතිහාර්යය, එක්සත් ජනපද අධිරාජ්‍යවාදයේ හා නව සීතල යුද්ධයේ වටලෑමෙන් එම ජනයාගේ ජයග්‍රහණය අපි ආරක්ෂා කල යුතුයි.

දෙවනුව, විවේචනාත්මක ලෙස. මූලික අයිතිවාසිකම් සම්බන්ධව පමණක් නෙවි, පන්ති අරගලයේ අර්ථයෙනුත්. අපනයන ආදායමට හානිකර විය හැකි වුවත්, කම්කරුවන්ගේ ආදායම් නැංවීම සඳහා චීනයේ කුලීකාර පන්තිය හා ධනපති පන්තියට එරෙහිව හැප්පෙන බවට ජනාධිපති ෂි ජින් පිංග් ප්‍රකාශ කොට තිබෙනවා. මෙය චීනයේ බහුතර ජනතාවකට සෙත සලසනු පමණක් නොව ;  අලුත් අන්තර්ජාතික ආර්ථික පර්යායක් දෙස තබන වැදගත් පියවරක් ද වනු ඇති. මේ තාක් කල් චීන ආර්ථිකය වර්ධනය වූ අන්ධකාර සම්මුතියට පටහැණි ක්‍රියාමාර්ගයක් මෙය. සංවර්ධනය වන රටවල්වලට අදාල ඉහල පොලී අනුපාතික යටතේ ලබා දුන් ණය කපා හැරීම තවත් වැදගත් පියවරක්. මේ දිශාව වෙත ගමන් කරන්ට අප බීජිං ආණ්ඩුව පෙලඹවිය යුතු අතර, ඔවුන් ඊට මැලි වන විට, විවේචනය කල යුතු වේ.

අපට ඇවැසි නව අන්තර්ජාතික ආර්ථික පර්යාය කුමක්ද?

නව අන්තර්ජාතික ආර්ථික පර්යායක් අප පරිකල්පනය කල යුත්තේ කවර අයුරින්ද? චිරස්ථායී ආර්ථික රටාවක් වෙත සිදු කෙරෙන කවර පරිවර්තනයක් සඳහා වුව, විශාල හරිත ආයෝජන අරමුදලක් අවශ්‍ය කෙරෙනවා. මෑතක පැවැති G-77 + චීනය රැස්වීමක් අමතමින් කියුබාවේ විදේශ ඇමති බෘෘනෝ රොඩ්‍රිගුවේස් පැරිල්ලා සඳහන් කලා මේ සඳහා වාර්ෂිකව ඇමරිකානු ඩොලර් ට්‍රිලියන 3.3 සිට 4.5 දක්වා වූ මුදලක් අවශ්‍ය බව. මගේ අදහස නම්, අඩුම තරමින් අපිට ට්‍රිලියන 10 ක් අවශ්‍යයයි.

මේක කරන්න පුලුවන්ද? ඇත්තටම පුලුවන්. යලි-අරමුණුගත කල ජාත්‍යන්තර මූල්‍ය අරමුදලක් විසින් නිකුත් කරන ඩිජිටල් මුදල් ඒකකයක පිටුබලය ලබන, යලි-අරමුණුගත කල ලෝක බැංකුවක් ගැන සිතන්න. මෙබඳු ක්‍රමයක් යටතේ සියලු ප්‍රාග්ධන හා වෙලඳ ප්‍රවාහයන් එම මුදල් ඒකකයෙන් නම් කරන්ට පුලුවනි. ගෝලීය ආදායමේ සියයට දහයක්, විශේෂයෙන් සංවර්ධනය වන රටවල හරිත පරිවර්තනය සඳහා ආයෝජනය කල හැකියි. ගෝලීය හරිත කේන්සියානුවාදයක්.

හැබැයි මයිකල් කැලෙකි මීට දශක ගණනාවකට ඉහත පෙන්වා දුන් හේතු නිසා හරිත කේන්සියානුවාදය යනු පරස්පරයක්. තමන්ගේ පැවැත්ම ගැන ප්‍රශ්නයක් මතු වූ විට, ධනපති පන්තිය කලබල වී බේරිල්ලට කේන්සියානු ප්‍රතිපත්ති අනුගමනය කලත්, එම ප්‍රතිපත්තිවල ප්‍රතිඵල ලැබෙන්ට පටන් ගන්නා වහාම, පාලක පන්තීන් ඊට පයින් ගහලා තම සුපුරුදු සූරාකෑමේ ප්‍රතිපත්ති වෙත මාරු වෙනවා. ස්වකීය ගැලවුම සඳහා තිබෙන මාවත අවහිර කරගැනීම ධනපති පන්තියේ ස්වභාවය.

එහෙම නම්, කරන්න වෙන්නෙ එක දෙයයි ; හරිත කේන්සියානු ප්‍රතිපත්තීන් ක්‍රියාත්මක කරන්ට නම්, අපට පලමුව සිද්ධ වෙනවා, කේන්ස් බෙහෙවින් අකමැති වූ දෙයක් කරන්න – ඒ මිහිතලයේ විනාශය වැලැක්විය හැකි හරිත කේන්සියානු ප්‍රතිපත්ති ක්‍රියාත්මක කරනවාට වඩා, ලෝක විනාශය සිදුවනු යෙහෙකැ’යි සිතන ගෝලීය අධිරාජ්‍යය බිඳ දැමීම.

ඒක කොහොමද කරන්නෙ? මේ වනවිට වර්ධනය වෙමින් තිබෙන අධි-තාක්ෂණ ක්‍රමවේද අපගේ විප්ලවය විසින් භාවිතා කල යුතුයි. සන්නිවේදන මාධ්‍යයක් ලෙස ප්‍රාග්ධනයේ අධිරාජ්‍යයට එරෙහි ප්‍රහාරය සංවිධානය කිරීමට එය අපට උපකාරී වෙනවා. උදාහරණයක් විධිහට, ප්‍රගතිශීලී ජාත්‍යන්තරයේ MakeAmazonPay ව්‍යාපාරය ගන්න. අපව බෙදා වෙන් කිරීමට ප්‍රාග්ධනය තිබුණු හැකියාව අධි-තාක්ෂණික මෙවලම් නිසා දුර්වල වී තිබෙන බවට වූ කරුණ රසවත් උත්ප්‍රාසයක් නෙමේද? අප කල යුත්තේ එකතු වෙලා, ලගා කර ගත නොහෙන සිහිනයක් ලෙස පෙනෙන දෙය සාක්ෂාත් කරගැන්ම සඳහා පැහැදිලි සැලැස්මක් ඇති කර ගැනීම.

ප්‍රාග්ධනයේ අධිරාජ්‍යය පෙරලා දැමීම කියන එකේ අදහස මොකක්ද? භූමියේ, සාගරයේ, අහසේ හා නොබෝ කලෙකින් අභ්‍යාවකාශයේ පවත්නා කොල්ලකෑමට ලක් වූ පොදු දෙය මිනිස් වර්ගයාට යලි අත්පත් කරගත හැක්කේ කෙසේද?

ආකාර දෙකක් තිබෙනවා : පලමුව, එක් සේවකයෙක්ට එක ඡන්දයක් යන පදනම මත, සමාගම් ඒවාවල වැඩ කන සේවකයන්ට අයිති විය යුතු බවට නීතිගත කිරීම. ජනතාවගේ ගනුදෙනු මත බැංකුවලට තිබෙන ඒකාධිකාරය අහෝසි කිරීම.

මෙහෙම කල විට, බැංකු අනවශ්‍ය දෙයක් බවට පත්වන අතර, ආර්ථිකයේ ධාවක බලවේගය ලෙස බැංකුවලට තිබෙන භූමිකාව ක්‍රමයෙන් ක්ෂය වී යනවා. අනෙක් අතට, වැටුප් හා ලාභ අතර තිබෙන වෙනස අර්ථ විරහිත දෙයක් බවට පත් වෙනවා ; සෑම කෙනෙක්ම, තමුන් වැඩ කරන සමාගමේ සමාන කොටස්කරුවෙක්.

බැංකු ප්‍රමුඛත්වය නිෂ්ක්‍රීය වීම සමග, කොටස් සඳහා තිබෙන වෙලඳපොල හා ශ්‍රම වෙලඳපොල මෙලෙස වියැකී යන විට, ස්වයංක්‍රීයවම ධනය ප්‍රතිව්‍යාප්ත වෙනවා. සෑම කෙනෙක්ටම මූලික මට්ටමේ ආදායමක් තහවුරු වන අතර, මෙහි විශිෂ්ට අතුරුඵලයක් ලෙස යුද්ධ කරන්ට තිබෙන සානුබලය ද වියැකී යාම සිද්ධ වෙනවා.

ප්‍රාග්ධනයට සමාජය මත තිබෙන අධිකාරිය අහෝසි කිරීම තුල, සෞඛ්‍ය සේවාව, අධ්‍යාපනය හා පරිසර ආරක්ෂාව සඳහා කල යුතු ආයෝජය බඳු වූ තිරණ ප්‍රජාවන්ට සාමූහික ලෙස තීරණය කරන්ට ඉඩ ලැබෙන පරිදි සමාජය වෙනස් වේවි. සැබෑ ප්‍රජාතන්ත්‍රවාදය අවසානයේ විය හැකියාවක් වේවි. පුරවැසියන්ගේ හා කම්කරුවන්ගේ සභා තුල අභ්‍යාස කෙරෙන ප්‍රජාතන්ත්‍රයක් ; දැනට තිබෙන ආකාරයේ, තිරය පිටුපස, කතිපයාධිකාර පන්තියේ රහස් සාකච්ඡාවල දී තීන්දු ගැනෙන වර්ගයේ ප්‍රජාතන්ත්‍රයක් නොවේ.

ප්‍රාග්ධනය හා මූල්‍ය ක්ෂේත්‍රවල සිද්ධ වෙන මෙම ද්විත්ව ප්‍රජාතන්ත්‍රීකරණය දැනට ලගා කරගත නොහැකි සිහිනයක් වගේ පෙනෙන බව සැබෑව. එහෙත් අපි අමතක කරන්ට නරකයි, එක්තරා යුගයක, පාලනය කරන්ට රජුට තිබෙන දිව්‍යමය අයිතිය අහෝසි කොට, සෑම පුද්ගලයෙක්ටම එක ඡන්දයක් සහිත මැතිවරණ ගැන සිතීමත් මේ විධිහේමසිහිනයක් පමණක් වූවා.  මෙම ද්විත්ව-ප්‍රජාතාන්ත්‍රීකරණය මිනිස් වර්ගයා වඳ වී යාමෙන් ආරක්ෂා කරගැන්ම සඳහා තිබෙන අත්‍යවශ්‍ය පූර්ව-කොන්දේසියක්. ඒක ඒ තරම් සරලයි.

අප විසින් ගොඩනැංවිය යුතු නව නොබැඳි ව්‍යාපාරයේ කාර්යයන් තමයි මේ. එහි අවසාන අරමුණ? දේශගුණික ව්‍යසනයට හේතු වන, ජනතාව හා පෘතුවි තලය නීත්‍යනුකූල ලෙස කොල්ලකෑම අවසාන කිරීම. මිනිස් සමාජය මත ප්‍රාග්ධනයට තිබෙන ආධිපත්‍යය සම්පූර්ණයෙන් අහෝසි කිරීමෙන් මෙහා මෙම විනාශය වලක්වා, පෘථිවිය බේරා ගැනීමට වෙන මගක් නැහැ.

සහෝදරවරුනි,

මේක හුදු මනස්ගාත සිහිනයක් නෙමෙයි, එකතු වුණොත් අපිට මෙය ජයගන්නට බැරි නැහැ!

පරිවර්තනය – රමිදු පෙරේරා